.:: PARTIDO MAN ::.

Pará patras:
Angelo Bernadina (tesorero), Charles Cooper (lider Polítiko), Desmond Leetz (komisario), This e-mail address is being protected from spam bots, you need JavaScript enabled to view it , Carl (Hans) Els (komisario), Randall Rafaella (komisario).

Pará dilanti:
Juaqila (Lila) Poulo (komisaria), This e-mail address is being protected from spam bots, you need JavaScript enabled to view it , Kenneth Gijsbertha (vise-presidente), Sherry Howell (komisaria), Arvid Villanueva (komisario)

Gerrit F. Schotte

Sekretario di Estado sra. Bijleveld ta deklará for di Den Haag ku diferente empleado públiko lo pèrdè trabou den e proseso pa Kòrsou bira
pais outónomo den Reino....

Nos a mira ku ta Sekretario di Estado sra. Bijleveld a bini ta dekretá akshonnan ku Gobièrnu di Kòrsou mester tuma den henter e proseso di struktura estatal i resientemente un di e akshonnan di su banda tabata kanta 15 di Desèmber 2008 komo fecha NO faktibel pa kambio di e struktura di nos pais (pais Kòrsou nase). Despues di a anunsiá esaki for di Den Haag esaki a bira un realidat i "regie groep" instituí dor di gobièrnu di Antia i Kòrsou, bou di maneho di Diputado Zita Leito, mester a simplemente sigui e ritmo i kumpli ku e òrdu di Sekretario di Estado sra. Bijleveld. Resientemente Sekretario di Estado sra. Bijleveld a bolbe deklará ku ámtenarnan lo pèrdè trabou den e proseso pa Kòrsou bira pais den reino i e proseso aki ta Diputado Zita Leito ta enkargá. Anto Sra. Bijleveld a deklará esaki despues ku Diputado Zita Leito resientemente a invitá tur Ámtenar na WTC pa duna informashon ku ningun ámtenar lo no pèrdè trabou. Esaki tabata entre otro un di e temanan di diskushon na WTC i tambe e diputado aki esta sra. Zita Leito, a menshoná na diferente medionan di prensa i tambe Eilandsraad ku esaki lo no ta e kaso.

Kiko nos tin ku konkluí for di e ekspreshon di sra. Bijleveld awor aki ?

Ta skonde e gobièrnu di PAR/PNP/FOL ta skonde laga sra. Bijleveld trese e mal notisia, pasobra nan no tin kara pa bin enfrentá e ámtenarnan ku nan intenshon makabre ? Ku e mesun urgensha ku e gobièrnu tin pa pasa tur e medidanan ku Hulanda ta dikta por ehèmpel alto supervishon MAN ta pidi gobièrnu pa ser sinsero ku empleadonan públiko, empleadonan públiko mester sa kiko ta pasa ku nan ora Kòrsou bira outónomo den reino.

MAN ta di opinion ku ta pais nobo nos ta kreando i esei ta nifiká ku empleado públiko no por drenta pais nobo sin trabou. MAN ta spera di tende opinion di representashon di ámtenarnan riba e mas resiente ekspreshonnan aki di sra. Bijleveld.

En todo kaso nos di MAN ta kere ku nos mester por hasi uso di tur ámtenar den e Kòrsou nobo. Tin hopi trabou pa hasi i si mester her-om- en bijscholing di nos ámtenarnan, esaki mester ser poné den práktika.

Gerrit F. Schotte
Eilandsraadlid (MAN)
Mobiel # 512-1277
 

E  RÒL DI MAN DEN UN KÒRSOU NOBO:
RETONAN PA NOS ORGANISASHON

BAN PREPARA NOS MES!

Miembronan di MAN, Distinguido Invitadonan, damas i kabayeros,


Mi ta yama boso awe nochi Bon Bini na apertura di e di 27 Kongreso Statutario di nos partido MAN ku nos ta tene kada dos aña pa repasá i fortalesé nos organisashon.

Na promé lugá, mi kier gradisí direktiva di MAN, miembronan i invitadonan ku ta presente na momentu di e Kongreso  aki, kaminda nos ta bai evaluá e desaroyonan aktual, pa asina nos por fiha e ròl ku MAN tin ku bai hunga den e Kòrsou Nobo. Mi ta honrá ku e presensha di un kantidat grandi di nos miembresia na e evento aki i ku nos invitadonan, tambe nos Keynote Speaker di awe nochi, sra. Nolda Römer-Kenepa, ku a akseptá nos invitashon pa papia riba su filosofia pa e Kòrsou Nobo i kon nos mester prepará pe.

Promé ku nos yega na e spich prinsipal di awe nochi, komo lider polítiko di MAN mi kier a repasá den liñanan grandi algun kos ku tin ku yuda nos den e dianan aki pa fiha e ròl di MAN den kuadro di nos vishon pa un Kòrsou outónomo.

Kòrsou Nobo i su Hende

Pa Nolda Römer-Kenepa



Introdukshon
Desaroyonan históriko sin duda algun a marka e hende di Kòrsou i ta hasi ku awe nos  pais tin e komunidat ku ta partí den diferente gremio i ounke ku por tin hende ku lo ninga esei nos ta karesé di union patriótiko.
En realidat ta asina ku nos tin e inklinashon di mustra lealtat òf solidaridat na sierto gremio den nos komunidat ku nos ta kere ku nos ta forma parti dje. Pa keda bon mirá nos ta trata tambe di komplasé un tiki ku tur gremio den nos komunidat a base di kualke interes, tin biaha a kosto di esun di Pais.
Awe mi ta para aki komo profeshonal, historiadó i archivista nashonal, pa papia tokante e hende di Kòrsou en espesial relashoná ku e Pias Kòrsou nobo ku nos ta a punto di konstruí. Lo mi purba aklará e situashon aktual di e hende di Kòrsou i duna sugerensha pa mehorashon.
Nos a puntra nos mes ku e asuntu di  union i patriotismo bou di e pueblo di Kòrsou na momentu di manifestashonnan kultural òf konmemorativo ta biba  sufisientemente den e sentimentu di e hende di Kòrsou. Si ta asina un hende di Kòrsou na momentu di desishonnan krusial ku ta toka pais no por tin duda òf sinti su mes insigur  pasobra e punto di salida mester ta “Kòrsou promé”.

Nos tin un bon ehèmpel kon e hende di Kòrsou den asuntunan fundamental di pais ta keda influenshá i ta mustra su insiguridat. Despues ku na e promé referèndem hendenan di Kòrsou na 1993 a opta pa mantené Kòrsou den Antia Neerlandes, ata mesun hendenan di Kòrsou, 12 aña despues na e Referèndem di 2005, ta skohe pa status aparte pa Kòrsou komo un pais outónomo den reino.
Despues di e referèndem di 2005 kada hende di Kòrsou ku ta un bon patriota mester ta hopi kontentu ku porfin nos Kòrsou por bai konsentrá tur atenshon i energia riba su desaroyo propio ku den e delaster 50 aña e mester a kompartí ku e otro islanan di Hulanda den Karibe.
Sinembargo nos a bin ta nota tambe ku e desaroyonan pa yega na e status aparte aki ta bai tranká. E pregunta ta di kon nos tur ta bisa ku nos ta stima Kòrsou i nos tur ke tur kos bon pa Kòrsou pero dikon nos no por mara un moketa.

Hopi biaha nos sa referí na Rubianonan komo ehèmpel pa ilustrá kon nan por tin nan desunionnan na kas pero ora ku ta trata interes di Aruba den mundu pafó ta , “Aruba Ariba”. E lema ki ta biba serka e Rubianonan.
Yu di Kòrsou, ounke e ta bisa di ta patriota, no ta demonstrá esaki den práktika ku e mesun pashon. Es mas, tin biaha hasta bo ta tende un yu di Kòrsou ta papia malu di  hende di  Kòrsou den presensha di un stranhero.  Simplemente paso e persona en kestion no ta di su gremio.  E papiado e ora ei ta referi na “nan” i “nos”. E ta papia di “nan” komosifiera e mes no ta parti di e komunidat. Na Hulanda nan ta yama nos “Antillianen” i nos ta aseptá esaki sin mas, ademas nos mes tambe ta yama nos mes asina na Hulanda pero mesora ku nos ta na Kòrsou, nos ta bira “yu di Kòrsou”. Esaki ta un terminologia ku a ser introdusí den promé parti di siglo 20 pa e hendenan di Kòrsou ku tabatin diferente generashon kaba na Kòrsou ku tabata papia papiamentu i ku kier a distinguí nan mes for di tur e kantidat di stranheronan ku e kompania Shell a importá riba Kòrsou pa por a realisá tur su aktividatnan ekonómiko. Ounke e parti emoshonal di e terminologia aki ta ketu bai bálido e terminologia aki awendia tin un implikashon mas amplio pa referí na e hende di Kòrsou.